Sigl anteriur territori da Mundaun dat ei sper la via cantunala veglia da Flond-Glion, circa in kilometer sut Flond, ina caltgera bein mantegnida. Dallas ulteriuras tschun caltgeras a Flond sesanflan duas ella part ost dil territori da vischnaunca e treis el sid dil vitg. En quater loghens sin igl anteriur territori da Sursaissa anflan ins restonzas da caltgeras, per exempel sut la miniera da fier a Plantenga ed el contuorn da Huot.

Ins ha saviu cumprovar ch'ei vegneva el Grischun gia barschau caltschina dil temps dils Romans. Pér ils onns 1930 ha il cement scatschau la caltschina. Ina caltgera da ca. 3 meters diameter e 3,6 meters altezia saveva furnir suenter 130-150 uras barschar tochen 25 tonnas caltschina. Da quei temps era la caltschina indispensabla per la construcziun da casas. Il surpli vegneva beinduras vendius per meglierar las finanzas communalas. L'entira lavur vegnava savens fatga sco survetsch tributar e corrispundeva aschia ad ina taglia communala indirecta. Ina tonna caltschina custava igl onn 1900 CHF 30.00.