Cordial beinvegni!
La vischnaunca da Sursaissa Mundaun sesanfla amiez la Surselva sin la vart dretga dalla val dil giuven Rein. La terrassa s'extenda sin ina lunghezia da ca. 14 km. La vischnaunca ha ina surfatscha da ca. 70 km2. La part populada sesanfla sin in'altezia denter 1'000 m s.m. (Axastei) e 1'430 m s.m (Miraniga). Ils uclauns ein tipics per ina vischnaunca gualsra. Ellas 31 fracziuns resp. uclauns vivan circa 1'130 habitonts. Tut ils uclauns ensemen fuorman la vischnaunca politica dad Obersaxen Mundaun.
L'anteriura vischnaunca da purs ei oz ina vischnaunca da turissem. Differents hotels e pliras pensiuns, ca. 2'000 habitaziuns da vacanzas e differents camps da vacanzas stattan a disposiziun a nos hosps da vacanzas. Grazia ad implonts da transport efficients ei nies territori da skis e da viagiar bein accessibels. L'agricultura gioga denton aunc oz ina gronda rolla en nossa vischnaunca. Varga 40 menaschis agricols moderns cultiveschan nies terren.
Fracziuns
Affeier (Affeiar)
ca. 105 habitonts
Affeier ei plein fassettas. Cheu dat ei enzacontas fatschentas ed ustrias, il chischner a Lorischboda, la paliu aulta a Valdunga, in territori natiral protegiu, il vitaparcours a Pifal sco era plazzas da grillar e da giugar.
Axastei (Àxastei)
ca. 6 habitonts
Axastei ei igl uclaun situaus il pli a bass sper la via en direcziun da Tavanasa. Cheu dat ei la caplutta forsa la pli veglia sin il territori communal. Il casti ella vischinonza savess esser in indezi per sia construcziun el 12avel ni 13avel tschentaner.
Bellaua (Palààwa)
ca. 6 habitonts
Il num deriva d'ina fontauna aviarta al pei d'ina costa. Tochen circa 1900 haveva liug adina il zercladur ina fiera ed ins di ch'ei hagi pli baul era dau cheu in'ustria.
Canterdü (Ggànterdüü)
Per il mument negins habitonts
Il culmar el sid digl edifeci il pli el nord dat perdetga digl onn da construcziun 1645. Ei setracta pia d'ina dallas pli veglias casas en vischnaunca.
Chlinga (Chlinga)
ca. 6 habitonts
Naven digl onn 1975 era il mulin sper il Sandbach a Chlingen il sulet mulin en funcziun a Sursaissa. Ils purs dalla vischinonza purtavan il graun per producir pavel. Oz ei era quei mulin serraus.
Chriegli (Chriaggli)
ca. 9 habitonts
Cunquei ch'ins ha urbarisau il terren entras arada, deriva il num digl uclaun probablamein da "Chriag", ina specia da criec primitiv.
Egga (Egga)
ca. 10 habitonts
Schegie ch'il casti da Moregg vegn numnaus en negin document dil temps ch'el era habitaus, deriva el probablamein era dil 13avel tschentaner. Era el era in "edifeci fortificau dall'administraziun" el district dil feudum hereditar dils baruns da Razén.
Flond
ca. 219 habitonts
Pffland! Aschia senumnava l'inscripziun dil sigil vegl dall'anteriura vischnaunca da Flond. Pffland vegn ad esser ina variaziun da "Pflanzland".
Friggahüs (Friggahüss)
ca. 19 habitonts
Igl uclaun da Friggahüs ei adattaus bein sco punct da partenza per excursiuns e turas da skis sin il Péz Titschal ed il Péz Valgronda. Pli baul deva ei cheu era in uffeci da posta.
Giraniga (Ggiraniga)
ca. 51 habitonts
A Giraniga entscheiva en direcziun da Sassli la via dils Gualsers cun tablas d'informaziun davart la vischnaunca. Pli baul deva ei cheu era in uffeci da posta.
Hanschahüs (Hàntschahüss)
ca. 12 habitonts
Hanschahüs ha era il num romontsch Cahanscha. Dalla combra d'aua dall'Ovra electrica Rein Anteriur SA (ORA) el sid meina in foss da pressiun diagonal alla centrala dall'ORA a Tavanasa, egl ost sesanfla la gallaria d'access alla clappa da fermada.
Janggahüs (Jànggahüss)
Per il mument negins habitonts
A Janggahüs vivevan pli baul ils tagliacrappa che luvravan a Meierhof en connex cun la construcziun dalla baselgia sco era il fetg renomau pictur artist indigen Rudolf Mirer. Igl uclaun ha treis casas e dus arcuns.
Markal (Marggààl)
ca. 51 habitonts
Markal vegneva pli baul era numnaus Roncal. La Via Mättel ei fetg teissa e meina sut igl uclaun alla staziun dalla Viafier retica da Vuorz. Pli baul carravan era autos sin quella via.
Meierhof (Meiarhoff)
ca. 214 habitonts
Meierhof ei il liug principal dalla vischnaunca. Cheu sesanfla l'administraziun communala, la casa da scola, differentas fatschentas, la staziun da val dallas pendicularas. Plinavon porscha il Center Steinhauser habitaziuns e combras per glieud attempada.
Mira (Miira)
ca. 8 habitonts
Mira ha survegniu siu num all'entschatta dil 12avel tschentaner, cura che la famiglia Mirer ha priu dimora cheu. Il dutg Mira nescha sut St. Josef e sbucca el Rein Anteriur.
Miraniga (Miraniga)
ca. 47 habitonts
Miraniga ei igl uclaun situaus il pli ault dalla vischnaunca. El sesanfla sin 1'421 m s.m. ed ei il liug da domicil dil skiunz renomau Carlo Janka.
Misanenga (Misananga)
ca. 85 habitonts
Dapi l'avertura dil Rufalipark 2011 stat il divertiment el center digl uclaun Misanenga. Cheu trenescha era Carlo Janka la stad sin la rampa da partenza.
Pilavarda (Pilawààrda)
ca. 32 habitonts
Il stan da sittar dalla secziun da catschadurs Sursaissa sesanfla sin il Huot sur Pilavarda. Pli baul era Huot in uclaun habitau cun treis casas.
Platenga (Platanga)
ca. 8 habitonts
A Platenga ha il renomau pictur artist Alois Carigiet (1902-1985) viviu e luvrau ils onns 1939-1952. Oz san ins visitar l'anteriura miniera a Platenga.
Platta (Plàtta)
ca. 10 habitonts
Il num digl uclaun deriva dil liug nua che las casas ein construidas, numnadamein sin la pintga planira. Igl uclaun ei aunc oz l'arrivada dalla cuorsa da scarsolas annuala dad Innertobel.
Pradamaz (Pradamaz)
ca. 9 habitonts
Sin la senda da viandar sut Pradamaz sesanfla la grotta da Lourdes. Pli baul fagevan ins cheu mintg'onn ina devoziun.
Runggli (Runggli)
ca. 5 habitonts
Il num Runggli deriva dil plaid runcar. Igl uclaun ei vegnius fundaus dalla populaziun romontscha.
St. Josef (St. Joosef)
ca. 17 habitonts
Il dulezi cumpeglia la casa, la stalla, il prau ed igl uaul. Il prau survescha oz per gronda part sco deponia e la casa vegn duvrada per la construcziun digl implont electric Tschars.
St. Martin (St. Mààrti)
ca. 32 habitonts
A St. Martin deva ei pli baul ina secunda scola per ils scolars dad Innertobel. Oz vegn la casa da scola duvrada sco camp da vacanzas.
Surcuolm
ca. 107 habitonts
Surcuolm fa ecclesiasticamein e politicamein part dalla Lumnezia. La fracziun ei era vegnida colonisada principalmein neu dalla "val dalla glisch".
Tobel (Tobal)
ca. 21 habitonts
Il num Tobel vegneva pli baul era duvraus sco surnum, sco per exempel per il plevon Tobel.
Tomahüs (Tomahüss)
ca. 8 habitonts
Tomahüs ei igl uclaun situaus il pli el vest dalla vischnaunca. Tochen igl onn 2004 fageva Tomahüs part dalla vischnaunca da Breil.
Tschappina (Tschappiina)
ca. 25 habitonts
Il num Tschappina deriva dalla runcaglia dil temps dils vegls Romans, dils Cruaruns che vivevan cheu gia avon l'immigraziun dils Gualsers.
Tusa (Tusa)
ca. 17 habitonts
Tusa sesanfla sin ina planira schurmegiada fetg sulegliva. El nord dallas casas sesaulza il crest Chàchambial che porscha bialas vestas. Per survegnir dapli terren fritgeivel han ins drenau il Riad da Tusla igl onn 1947.
Valata (Valààta)
ca. 26 habitonts
La casa mulin ei vegnida renovada ed ei oz habitada. La punt dil mulin survescha oz sco senda da viandar. A Valata sesanflan plinavon la pratica da miedi, la staziun da val che meina sin il Péz Mundaun e la serenera.
Zarzana (Zarzààna)
ca. 9 habitonts
Il dutg Zarzana separa igl uclaun ellas duas parts Indarzarzààna ed Üssarzarzààna. L'uniun Pro Supersaxa ha renovau ina stalla a Zarzana che dat perdetga dil temps cun descripziun dallas parts.