Declaronza da taglia 2024

Tgi che ha obteniu negin avis, ni ha formulars che mauncan, sa retrer tals tier igl uffeci communal da taglia. Il program da tschentar ora la declaronza da taglia stat a disposiziun egl internet sut www.stv.gr.ch.

Ils termins per inoltrar la declaronza ein fixai sco suonda:
Ils 31 da mars 2025 per persunas cun activitad da gudogn dependenta, scolars e students maiorens, pensiunai, disoccupai e cuminonzas d’artavels. Ils 30 da settember 2025 per persunas cun activitad da gudogn independenta, societads semplas sco era persunas domiciliadas ordeifer il cantun cun menaschis ni schischom el cantun resp. en vischnaunca.

Inoltrar la declaronza da taglia:
La declaronza da taglia ei BUCA pli d’inoltrar tier igl uffeci communal da taglia, mobein sut suandonta adressa: Steuerverwaltung des Kantons GR, Verarbeitungszentrum 1/KO, Steinbruchstrasse 18, 7001 Chur

Taxaziuns da taglia:
Tier l'Administraziun cantunala da taglia vegn duvrau in niev program da taxaziun a partir dalla perioda fiscala 2024. Pervia da questa midada ha ei gia dau en il passau retards el process dalla taxaziun. La scolaziun dil niev program tras l'Administraziun da taglia ha liug il mars 2025, pia pon las lavurs da taxaziun vegnir fatgas pér naven digl avrel 2025. Deplorablamein vegni a dar retards era tier las taxaziuns 2024. Nus essen sestentei da terminar las taxaziuns da taglia aschi spert sco pusseivel e da tarmetter quellas als pagataglias. Nus essen engrazieivels, sche Vus inoltreis tuttina las decleraziuns da taglia 2024 enteifer il termin fixau. Vus gideis cun quei a tener ils retards aschi pigns sco pusseivel.

Prolungaziun dil termin:
Damondas per prolungaziuns dil termin ein d’inoltrar avon la scadenza dil termin sco suonda:

– online: www.stv.gr.ch
– per e-mail: steueramt@obersaxenmundaun.swiss
– en scret: Steueramt Obersaxen Mundaun, Vorstadt 26, 7134 Obersaxen, Tel. 081 920 50 86

Las damondas da prolungaziun ein d’inoltrar cun las suandontas indicaziuns: numera da register cumpletta, num, prenum e vischnaunca da domicil. Ils termins concedi vegnan buca confirmai e san da principi buca vegnir prolunghi. En cass singuls extraordinaris san ins tschentar in’ulteriura damonda da prolungaziun.

Suttascripziun dils conjugals:
Conjugals che vivan giuridicamein ed effectivamein en ina lètg nunseparada ein suttamess communablamein alla taglia. Omisdus ein obligai da suttascriver la declaronza da taglia.

Informaziuns:
Per ulteriurs sclariments stat igl uffeci communal da taglia (081 920 50 86 / steueramt@obersaxenmundaun.swiss) bugen a Vossa disposiziun.

07-02-2025
uffeci communal da taglia