„Bien di“ ni „Guata Tàgg“ giavischa a Vus la biala vischnaunca dad Obersaxen Mundaun e beneventa Vus cordialmein.

La vischnaunca ei situada sin ina liunga planira aulta en Surselva e porscha bia natira pura e puncts panoramics impressiunonts sco il Péz Mundaun. Sut il motto: quater pézs, duas vals e vegn implonts porscha la regiun da skis dad Obersaxen Mundaun pistas bein preparadas per tut ils nivels. Per in temps da vacanzas variau procuran activitads sco

• ir cun skis ni cun aissa sin pistas cun ina lunghezia totala da 120 km 
• far cuorsa liunga 
• ir cun gianellas 
• viandar igl unviern 
• scursalar 
• ir cun patinas 
• viandar sin sendas bein marcadas cun ina lunghezia totala da 150 km 
• far bogn el Rufalipark 
• lavar aur 
• observar la selvaschina 
• ir cun mountainbike 
• ir cun trottinet dil cuolm tochen giu Glion 
• PitPat (minigolf da meisa) 
• e bia auter

Il post da contact per tuttas damondas e propostas da nos hosps ei la Surselva Turissem SA. Il biro d'informaziun a Meierhof ei aviarts l'entira jamna, duront la stagiun era la sonda.