Pumpiers Obersaxen Mundaun

En cass d'incendis, stempraus, auas grondas, accidents cun ieli, tiaratriembels e catastrofas han ils pumpiers l'incumbensa da salvar e proteger veta e proprietad periclitada. Per quest intent fan ver 80 umens e dunnas ella vegliadetgna da 18 tochen 40 onns survetsch activ. Il bien stadi da scolaziun ed ils mieds auxiliars moderns permettan a nos pumpiers da porscher spert agid cumpetent.

Per regla vegn igl  incendi annunziaus resp. ils pumpiers alarmai via il numer 118. Il post d'alarm che retscheiva Vossa annunzia alarmescha immediat ils pumpiers sur il pager. Lezs decidan, sch'els ston mobilisar ulteriuras persunas e material. Da grondas malauras ein las centralas d'alarm per part surcargadas cun telefons. Ei quei il cass, saveis Vus era empruar da contonscher nus sur il numer da telefon dil cumandant da pumpiers, 079 402 99 28.

Ils cuosts per igl agid dil pumpiers van da principi a quen dalla vischnaunca. Sch'il donn vegn caschunaus intenziunadamein ni per greva negligientscha, sa la vischnaunca pretender anavos ils cuosts d'acziun dalla persuna responsabla. Per las suandontas acziuns vegn per regla tschentau quen:

  • dustanza d'ieli
  • incendis d'autos el liber
  • rupturas da conducts egl intern da baghetgs
  • survetschs a caschun d'occurrenzas e d'eveniments gronds
  • acziuns facultativas
  • protecziun encunter radiaziun

Contacts

118 clom d'agid

Cumandant da pumpiers
079 402 99 28 Christian Henny
Vicecumandant da pumpiers
079 489 82 85 Martin Alig
Furier ed actuar
081 920 50 80 Ivan Vinzens 
Schef da material
078 718 88 97 Ivo Janka