Igl uffeci dil survetsch social informescha e cusseglia en cass da damondas dil sectur social. Ulteriuras informaziuns: www.pro-senectute.ch 

Pagament anticipau d'aliments ed agids agl incasso

Tenor l'Ordinaziun dal cussegl grond davart il pagament anticipau da contribuziuns al manteniment d'affons cun dretg d'aliments (DG 215.050) fa la vischnaunca dil domicil civil dils affons cun dretg d'aliments pagaments anticipai tochen maximalmein il 25avel onn da vegliadetgna dils affons, sch'ils geniturs san buca – ni buc ad uras – ademplir lur duer da manteniment. Ils pagaments anticipai ein negin sustegn public per ils affons ni per il genitur senza obligaziun. Els san vegnir fatgs valer dalla vischnaunca mo per il genitur obligau.

La damonda per pagaments anticipai ni per agids agl incasso ella vischnaunca dad Obersaxen Mundaun ein da drizzar al survetsch social regiunal a Glion ch'ei responsabels per l'elaboraziun dallas damondas. Fixei in termin al telefon e s'informei tgei documents che Vus stueis prender cun Vus al discuors.

Indemnisaziun da maternitad

Dunnas cun activitad da gudogn ni activitad da gudogn independenta han da principi il dretg da survegnir duront 14 jamnas dalla maternitad la cumpensaziun dil gudogn dad 80 pertschien dalla media da lur gudogn avon la naschientscha (max. CHF 196.00 per di). L'indemnisaziun da maternitad sebasa organisatoriamein e proceduralmein sin las regulaziuns digl uorden da cumpensaziun dil gudogn (UCG).

Agid a victimas

Ils posts da cussegliaziun digl agid a victimas stat a disposiziun a tut las persunas pertuccadas d'in delict ed a lur confamigliars. Las damondas vegnan tractadas confidenzialmein. Tut ils collaboraturs suttastattan all'obligaziun da discreziun. Vus saveis era seschar cussegliar anonimamein.

Giurisdicziun gratuita

Ina permissiun per giurisdicziun gratuita survegnan sin damonda persunas natiralas che retilan sustegn public ni ch'ein buc el cass da pagar, ultra dalla subsistenza basegneivla per ellas e lur famiglias, ils cuosts da process necessaris. Ina damonda vegn refusada, sch'il process ei da levsenn ni envans. La permissiun vegn per regla limitada ad in'instanza. La damonda ei d'inoltrar ensemen cun las indicaziuns necessarias al presidi dalla dertgira concernenta.

Agid economic

Nus prestein a norma dalla lescha d'agid social igl agid necessari a persunas che sesanflan en ina situaziun d'urgenza. Tgi che sa tenor quella buca pagar sufficientamein ni ad uras cun agens mieds sia existenza e l'existenza da sia famiglia domiciliada el medem liug, sa dumandar per ina concessiun d'agid economic. Ei vala da garantir il minimum d'existenza social. Persunas pertuccadas cussegliein nus cun la discreziun necessaria e gidein ellas da surmuntar situaziuns d'urgenza.