Infra Mundaun SA;
Dapi la fin digl onn vargau ein las lavurs vid ils projects dall’Infra Mundaun SA (sendas tematicas, purschidas da bike, tuor da reiver e plazza da giugs Triel, engrondaziun digl indrez d’ennavar) s’avanzai. Bugen vul il cussegl d’administraziun informar tuttas persunas interessadas davart il stan dil project e la finanziaziun previda. L’occurrenza d’informaziun communabla dallas vischnauncas Lumnezia ed Obersaxen Mundaun ha liug sco suonda:
- Mesjamna, ils 4 da mars 2026
- 20.00
- Sala dalla casa da scola a Vella
La finamira dall’occurrenza ei d’informar, discuorer e preparar las votantas ed ils votants dallas vischnauncas Lumnezia ed Obersaxen Mundaun sin las radunonzas communalas che suondan.
Bugen envidein nus Vus da prender part e selegerein sin in interessant brat da meinis.
La vischnaunca dad Obersaxen Mundaun organisescha ina pusseivladad dad ir cun in auto/bus naven da Meierhof a Vella (cun stops a Chummenbühl, Affeier, Flond). Interessai s’annunzien per plascher entochen gliendisgis, ils 2 da mars 2026, tier l’administraziun communala Obersaxen Mundaun, 081 920 50 80.
20-02-2026
Cussegl d’administraziun Infra Mundaun SA