Scamond absolut da far fiugs e da far fiugs artificials sin territori dalla vischnaunca dad Obersaxen Mundaun

Muort las temperaturas cuntinuontas d'aulta stad e la schitgira extraordinaria regia ella regiun Surselva e cunquei era ella vischnaunca dad Obersaxen Mundaun in scamond absolut da far fiug el liber.

Igl Uffeci d'uaul e prighels dalla natira dil Grischun informescha sin sia pagina d'internet www.waldbrandgefahr.gr.ch davart la situaziun actuala, davart il prighel d'incendis d'uaul ed ils scamonds da far fiug el cantun Grischun. Informaziuns detagliadas davart las singulas regiuns dil cantun anfleis Vus ensemen cun las reglas da cumportament corrispundentas silla carta da prighel d'incendis d'uaul cantunala, la quala ei medemamein contonschibla sut il link www.waldbrandgefahr.gr.ch.

Ordinaziun supplementara dalla vischnaunca Obersaxen Mundaun: 

• Il scamond absolut da far fiug ei d'observar strictamein. Tut ils fiugs el liber ein scumandai.
  Excepziun: El spazi da habitar resta ei lubiu da far diever da grils da cotgla, gas ed electric sin terren solid. Denton eis ei da far la pli gronda precauziun. 
• Tut las fueinas publicas dalla vischnaunca ein serradas. Igl ei scumandau da far diever dad ellas. 
• Products da tubac e schuebels astgan buca vegnir fiers naven senza far stem.
• Igl ei scumandau da barschar fiugs e fiugs artificials pigns (candeilas miraculusas, vulcans e.a.v.). Quei vala cunzun era per la fiasta naziunala, igl 1. d'uost 2026.

Vinavon vala: 

• Schar ir si latiarnas dil tschiel (latiarnas da cletg, da giavischs ni da kong ming) ei scumandau tenor la lescha davart la protecziun encunter incendis dil cantun sur onn. 
• Il barschar rumians verds ch'ein buca schetgs avunda ei tenor l'ordinaziun da tener l'aria schubra da principi scumandau. Quei vala cunzun per fiugs da rumida. Ulteriuras informaziuns anfleis Vus sut www.waldbrandgefahr.gr.ch.

Cun ina scluccada dalla situaziun ei da quintar pér suenter plievgia abundonta sur plirs dis. Cuorts urezis ni pintgas quantitads da plievgia han strusch effect.

Nus engraziein a Vus per setener vid las prescripziuns dil cantun Grischun e dalla vischnaunca dad Obersaxen Mundaun e giavischein a Vus in festiv 1. d'uost 2026.

Suprastonza communala Obersaxen Mundaun 
Commando da pumpiers Obersaxen Mundaun