Valetaziun da revisiun cantunala per la vischnaunca Obersaxen Mundaun
La davosa valetaziun da revisiun dils beins immobiliars surbaghegiai sil territori dalla vischnaunca Obersaxen Mundaun ha giu liug igl onn 2005 tochen 2013 (Obersaxen 2005 tochen 2007, Mundaun 2013).
Il biro da valetaziun Glion entscheiva naven digl uost 2025 cun la 5-avla valetaziun da revisiun ella vischnaunca Obersaxen Mundaun. Las empremas averturas succedan naven dil schaner 2026. Buca valetai vegnan ils beins immobiliars ch'ein vegni valetai suenter ils 31 da december 2023.
Las valetaziuns vegnan adattadas allas relaziuns actualas dil marcau. La cooperaziun dallas proprietarias e dils proprietaris ella procedura ei fetg impurtonta, perquei che l'inspecziun ha buca liug en mintga cass. Perquei supplichein nus Vus da rispunder cumpletamein il questiunari che Vus survegnis avon la valetaziun da revisiun e da tarmetter anavos quel. Per ulteriuras informaziuns stat igl Uffeci per la valetaziun d'immobilias, biro da valetaziun Glion, Plazza Cumin 9, 7130 Glion, telefon 081 257 62 50, bugen a Vossa disposiziun.
Ulteriuras informaziuns anfleis Vus tier www.aib.gr.ch.
Vischnaunca Obersaxen Mundaun
Uffeci per la valetaziun d'immobilias, biro da valetaziun Glion